【勞保篇】工傷點先計又賠幾多？
過咗試用期當然代表已經站穩陣腳啦~但在職時都會遇到唔少問題，今次就會主力同大家探討 好多時大家都喺未發生事故前，完全冇理過嘅勞工保險 (下稱勞保) 問題。尤其係從事高風險行業如飲食業，更加應該未雨綢繆！知多啲一定係利多於弊！
· 係人都有勞保？
首先大家要知道無論係合約制、全職、兼職甚或係暑期工，所有僱員都應該喺因工意外受傷嘅情況下得到勞保保障。除非係用臨時性質僱用啦(炒散呢類就係)，否則公司冇幫員工買勞保係絕對犯法㗎♀️♂️！
· 何謂工傷？
Source from: https://img01.gahag.net/201602/22o/gahag-0058894347.jpg
上面講到工傷嘅定義，其實就唔限於一次性喺工作期間意外受傷嘅，如果因為長期重複做某啲動作 /程序而患上指定46種職業病都係可獲賠嘅。譬如話因為成日打字或要用手指所引致嘅手或前臂痙攣、長期需要搬運重嘢而令到手腕或手肘出現外傷性炎症都喺受保範圍內。
咁當然，無論係工傷抑或係職業病，第一時間一定係睇醫生！而根據勞工法例，僱主係可以要求員工睇指定註冊醫生 / 中醫 / 牙醫㗎！只有得到醫生證實，先至有後續程序。記得！醫療記錄(證明係工傷嘅文件)、收據、病假紙全部都要交正本畀僱主，但自己都要有份副本留底！
另外，如果受傷原因係僱主、同事或第三方疏忽所導致，僱員係可以嘗試向工傷疏忽索償方向走，畢竟呢個情況下會有更高機會獲得更高賠償金額，不過呢部分就超出下文討論範圍了~
· 幾時先計工傷⏰？
「返緊工 (ing) 計唔計工傷？」係大家經常討論嘅，但好不幸地事實上係絕大部分情況下，返緊工 (ing) 呢段時間係唔受保㗎！即係話無論係上樓中嘅電梯入面或者喺屋企大堂發生事故，都係同獲唔獲賠無關！除非係下幾種情況：
– 八號風球或以上 / 紅色或黑色暴雨生效期間 返工/放工4小時內 (只限直接往返屋企同公司途中)⛈️
– 搭 / 揸公司車返公司途中
– 為咗出Trip搭乘任何交通工具途中 (講緊出國)✈️
· 工傷賠償點計？
(1)只要符合工傷嘅定義，公司就有需要負責(1)有薪工傷病假、(2)醫療費及(3)補償金額。(1)就大家都明係按比例計正常工資5分4
(2)其實即係睇醫生⚕️⚕️嘅診金，住院同唔住院睇一次都係每日賠上限$300，如果需要做手術上限就會係$370。交咗收據畀公司之後，公司就要喺21日內發還。
(3)就係被判為永久地部份喪失工作能力，或永久地完全喪失工作能力甚至係因工死亡☠️先會有呢筆錢，實質金額尤其係後者好多時都係僱主同員工/家屬於唔低於法例要求下自行協商。
– 舉例僱員受傷時40歲以下，被判為永久地完全喪失工作能力，法例上要求嘅補償金額為$537,780或96個月收入。(每月收入上限為$35,600，以金額較高者為準)
其他不獲賠嘅理由？
明明係工作時受傷但最後都不獲賠？絕對有可能！譬如係：
– 作出虛假陳述，包括冇申報以前嘅職業病史
– 工作時間飲酒 / 吸毒所致
– 故意自殘
