辦公室戀情👩🏻‍❤️‍👨🏻是福是禍？

正所謂「近水樓台先得月」，同一間公司遇著心儀對象唔去追求，錯過機會的確係有後悔嘅可能，但又有俗語勸世人「唔好喺度食喺度屙」，處理得得唔好分分鐘就邊一方面都唔討好，嚴重起上嚟連份穩陣嘅工都冇埋就唔抵！咁到底要愛情定麵包？呢度會用少少身邊成功&失敗例子嚟同大家探討吓~(戴頭盔)講到尾，愛情來到係冇分對與錯，下文還請大家多多包涵！

🤔應唔應該開始辦公室戀情？

問得即係代表對發展呢段關係有遲疑，咁就好應該搞清楚自己到底擔心緊乜！夠唔夠鍾意一個人 / 對方背景唔簡單呢類問題就麻煩各位搵自己啲親朋好友分析，而喺一段辦公室戀情入面最需要深思熟慮嘅課題係——如果發展呢段關係影響到工作，最大程度嘅犧牲係講緊要其中一方甚至雙方都要離職，雙方係唔係都願意及可以承擔？如答案係否定，即係呢刻唔係相愛嘅好時機。如果兩個人真係有緣份，老套啲咁講，打風都打唔甩啦！

又，假如真係發展到其中一個人願意為女神/男神搵第二份工都好，比起以其他方式起埋一齊嘅情侶，原‧辦公室戀情後續要面對嘅挑戰仲有好多！包括但不限於：雙方冇咗「公司」呢個連繫仲有冇共同話題/興趣？轉工後發展得唔如意會唔會埋怨對方？適唔適應到由日日朝見口晚見面變成要約晚飯約週末？

🤔應該低調定高調？

其實呢個問題唔好話個對象係同一間公司甚至係同一個部門嘅人，一般情況下大家都唔會輕易同未混熟嘅同事分享私人感情事，而且有人嘅地方就有是非，就算未正式起埋一齊，雙方平時互動啲小動作或者微表情都好易被人發現，然後成為其他人茶餘飯後嘅花生。所以如果自問面皮薄，就算係無惡意嘅開玩笑都接受唔到，咁就有咁低調得咁低調啦~身邊亦都有一對可以喺一年內保持低調，拍拖拍到結婚嘅成功例子，而佢哋決定結婚嗰一刻亦已經商量好會有其中一方遞上辭職信。當然，要點樣相處始終都要雙方配合，喺一段未成熟嘅感情關係入面，單方面狠狠要求低調好可能會令對方不安；相對地，只要兩個人都覺得時機成熟同諗清楚後果，就不妨製造機會被其他人發現從而公開關係！又再以身邊人經歷嚟講，一開始愛得高調，同級關係還好，如果係上司同下屬，仇恨值好易瞬間拉高，無論點做都會招人話柄，嚴重嚟講係絕對會影響工作氛圍以至個人名譽。

🤔被人揭破戀情應該點算？公開咗就咩都唔怕？

同一個問題亦適合前後腳入職嘅情侶，除非真係唔見得光或者對方係唔適合分享嘅對象啦，否則被人發現一律建議直接承認，以免製造更多問題。喺度都可以分享真人真事，等大家了解吓到底死都唔認可以有幾麻煩：朋友同上司拍拖，一位平時對朋友都幾關懷嘅同事留意到兩個人眉來眼去就直接問兩人關係，但朋友唔想公開就話「自己同上司各方面都唔適合，0%機會」，點知呢位同事聽到之後竟立即表白！朋友瘋狂派好人卡都好，呢位同事都係死纏爛打，搞到最後三敗俱傷。

但公開咗都唔代表一勞永逸，一齊返放工但遲到早退、工作時間一齊消失咗一兩個鍾呢啲唔使教都知唔可以做啦~而呢度想同大家分享嘅係——唔好咁傻咁天真地以為同事 / 上司識哂兩邊就係最適合嘅諮詢對象！首先要求同事 / 上司就兩個人嘅感情事提供意見本身就強人所難，有冇諗過就係因為識哂兩邊先唔方便評論太多？有啲傻豬會以為講咗「唔好同其他人講」就得，今日同A同事講，聽日又同B同事講，搞到件事變成半公開甚至人人都知時，尷尬嘅就係自己！而且好多時兩性話題唔係個個成年人都想傾，提供太多資訊俾共事嘅人一定係壞處多於好處！點解咁講？舉兩個簡單例子(為方便閱讀，以下會以A、B作為一對情侶名稱)：(1) A同人呻呢兩日同B冷戰中，然後B今日去見客，表現得唔好，就算明明係個客本身就冇意欲簽約，但同事sss會點諗呢？(2) B喺SNS上分享睇完醫生要請幾日病假，轉個頭A就向公司請事假，兩件事係咪有無限空間被人解讀？總結而言，人言可畏，辦公室情侶一舉一動本來已經備受關注，想舒適又長遠地發展要記得拍拖係兩個人嘅事，發生咩事都唔好拖同事/上司落水！

🤔被上司追求但自己對對方冇意思點算好？

坦白講，除咗直接拒絕都冇咩可以做，唔好抱住可以做娘娘收兵嘅心態吊上司癮，亦唔好萌生任何可以從呢件事上得到好處(易啲請假、做少啲嘢)嘅諗法。拒絕嘅方式要視乎上司性格而定，有啲人用暗示嘅方式一點就明，亦有啲人要當面、決絕地Say No先得，但無論上司係邊款人格，記得要留啲情面俾對方落台！假使大家都係個喺感情上足夠成熟嘅人，企硬立場Say No係唔會有任何後果(只係現實很骨感)！

🤔分手點算好？

就算話係和平分手都好，辦公室情侶分手仲要日對夜對係一件非常痛苦嘅事。初期都仲可以靠放假去逃避，但始終都有要返工面對對方嘅一日。當初低調處理、從冇承認過起埋一齊嘅都仲可以扮冇事發生、自行消化；愛得轟轟烈烈嘅，雖然都可以大方地坦誠兩個人已經分開，但現實根本好難做到相安無事。親身經驗係大多數都會因為兩家各自表述一個分手理由而演變成羅生門，最後嘅最後，都係要靠其中一方調職/離職先解決到。