唔知大家係「不知不覺」定係「終於」去到2024年年底呢？正所謂心態決定境界，了解多啲職場現況，或者就會發現當下自己身處緊嘅環境同想像中唔一樣！而且，捉緊新潮流只有好處，一嚟有持續進修嘅心就冇咁易被淘汰，尤其做到中高層真係要花更多時間服侍老闆同理解下屬嘅諗法，佢哋講啲新Terms已經唔再係AI同ChapGPT，總唔可以樣樣都話聽唔明㗎嘛！再講，就算只係基層職員，年底做Appraisal同上司傾計又好，拎完花紅去搵新工時仲可以表現吓自己有幾緊貼時事！
Z世代改變職場
有玩開Threads嘅可能間唔中都會見到呢句，佢嘅意思係中性嘅，字面意思就係話幾乎係剛踏入職場冇耐嘅Generation Z （維基百科定義係97年左右至2010年代初期出生），因為成長背景已經係網絡全面普及嘅世代，更善於及樂於接納使用各種新科技如AI，普遍亦愛花時間喺社交媒體上。因此佢哋對日積月累落嚟嘅職場框架、約定俗成嘅潛規則都有另一套睇法。
而且佢哋亦大多唔介意直白地表達意見，甚至直接由自己改變職場生態，譬如話本來大家都願意每日無償OT半個鐘或以上，不過Gen Z入職後就表明夠鐘就會閃人，自此就陸續有人跟佢一齊準時開工、準時收工；亦有新人認為彈性上班好基本，唔應該斤斤計較員工有冇遲到同遲幾多，只要有準時完成工作就得。
Z世代最近喺唔少人唔少調查中都被為係超級著重Work-Life Balance、薪金至上主義、坐唔定好快就會離職、價值觀同其他員工差異巨大以至有企業認為有需要解僱佢哋。然而現實係每個世代嘅Fresh Grad初進入職場都會被上一代人批評，加上每個人性格特別其實都唔一樣，與其口不擇言地話想炒哂Gen Z員工，不如實際啲諗方法點加強員工嘅歸屬感更好！
安靜休假 & 飛行模式
早兩年左右流行講安靜離職（躺平文化 / Quiet Quitting），雖然有個Quit字但意思唔係唔撈，而係只做份內事及被動地工作。今年開始就多咗個兩個新名詞——安靜休假（Quit Vacationing）、飛行模式（Airplane Mode），前者意思係乾脆唔申請就自行放假，特別係有得選擇Work From Home嘅工作會更常見呢個新生態，例如話佢會如常回覆Email、如常Phone Meeting，只係肉身不在Office或家中，更甚者可能人已北上或飛咗去外地。
至於飛行模式…相信原意大家都熟悉，放喺職場上係代表收工或放假就即刻熄機，唔會再「在線」24小時。客人 / 合作夥伴 / 上司及老闆 24小時都有可能查詢或投訴，作為一個稍為有啲責任心嘅員工好難次次都視若無睹，忍唔住覆咗一次就會有下次……就算講明請AL去旅行都照Call照Send Message真係令人好煩躁！That’s why愈嚟愈多打工仔為咗擁有真正嘅休息時間，會選擇一放假、一到週末甚至一放工就立即Mute哂所有公事Group……
當無時無刻都放唔低部手機，僱員就會開始感到放假同返工冇分別，繼而會喺真正嘅工作時間內集中唔到精神亦更易感到不滿，反而降低工作效率。有見及此，外國有啲企業直情呼籲僱員每星期搵一日Set 2小時Offline時間，佢哋相信給予員工一定程度上嘅私人空間反而有效提升工作效率。
大疏離潮
香港就話有結業潮，而美國就於2024年下半年開始出現大疏離潮（Great Detachment）。大疏離潮即係僱員、僱主、公司之間關係每況愈下，僱員投入唔到工作、對工作失去熱情，於是開始騎牛搵馬，亦唔介意被認為Jumpy同有Gap Year。而呢個風潮，坊間認為係Quiet Quiting & Quiet Vacation所催化嘅結果。
大疏離潮下員工唔會隨便Quit，但一有更好Offer就會即走
唔好以為呢股潮流只限歐美，向來被認為職場文化係比較壓抑、怕展現真實一面會麻煩到人嘅日本亦新興代客辭職服務，其中一位創立者受訪時話每個月都有約2,000人幫襯，8成用戶年齡都處於20至30歲間，需要用接近成$1,000搵人幫手辭職嘅原因包括唔希望上司拒絕、放完長假進入唔到返工Mode、唔鐘意老闆等。
另外，韓國年輕人間亦流行「Toastout」呢個形容詞，源自職業倦怠 Burnout，意思係返工返到絕望，依據烘燶多士入面所夾嘅餡料仲可以反映受壓程度。
會出現呢啲諗法亦係大疏離職潮嘅現象之一，再睇返香港現況，不時都有新聞報導話香港職場壓力指數高過其他地區、內地優才來港後破壞本地職場文化、退休年齡不斷推遲、減少WFH / 彈性工作安排……嚟緊年尾Appraisal，中高層們都係時候關心吓下屬同檢討吓工作安排喇！
Queenagers
全球人力資源平台Deel提出應該更重視45~65歲左右嘅職業女性，呢班Queenagers雖然人到中年，但憑著多年嘅寶貴職場經驗，反而係職場不可多得嘅前線戰力！Deel認為呢個族群如果有小朋友，大多都已經係讀緊書嘅年紀，因此佢哋係非常適合同公司作戰嘅人選，建議僱主尊重其實係人都有嘅Family Time需求及提供更高自由度，咁就可以避免佢哋離職之餘又吸引到舊戰友重返職場！至於呢套說法適唔適用於遲婚‧不婚‧不生育指數高企嘅地方，就一齊觀望啦！
ESG
心大心細大學揀科或有意轉行嘅話，可以密切留意呢3隻英文字——ESG。ESG即環境 Environmental、社會 Social 及管治 Governance，呢個環保議題目前喺香港社會極受重視，香港政府亦曾於2021年發佈《香港氣候行動藍圖2050》，內文提到要以「零碳排放‧綠色宜居‧持續發展」為願景，又期望於2050年可以實現碳中和目標。儘管紙餐具同垃圾袋政策都唔能夠話順利進行，亦有調查指本地企業喺ESG、可持續發展範疇係全球企業入面表現疲弱，但亦無礙於呢方面嘅社會人材求才若渴。自問本來都關注以上社會問題同對綠色科技有興趣，可以報讀AI日常應用、可獲ESG證書嘅相關課程。
