世界職場知多啲（一）日本‧新加坡‧澳洲
雖然本地職場都仲有好多值得討論嘅項目，但今期我哋一於跳出香港，睇睇世界職場嘅不同，無論之後有冇機會出走都好，又抑或之前都試過喺當地做留學生 / 打工渡假，就當係睇小知識咁，希望有助有意去當地體驗另一種生活嘅朋友有初步認知啦！今次會首先去三個海外工作熱點，唔知大家又覺得邊一種環境比較適合自己呢？
點解要去海外工作？
其實唔一定係因為移民，只要公司環境有變，可能係有意發展海外部門要搵資深同事過去幫忙「開荒」，亦可能係同另一間海外公司傾成某啲重大項目而有需要互相安排人手到當地……原因太多，不能盡錄。但大家千萬要留意，如果只係面試時對方提出有可能有去外地嘅安排，就要打醒十二分精神，唔好輕信畀人賣去某某園區啊！
去海外工作前要打點嘅清單
簽證：記得提前準備好各樣證書、證明正副本，練定聽、寫當地語言
居住問題：公司會安排宿舍？酒店？有住宿津貼？短租定長住？有室友？畢竟生活環境不同，要處理嘅問題亦有千千萬萬種組合。簡單舉例就係去日本住就要學垃圾分類，去澳洲就好大機會需要車牌
薪金及生活資金：以外國人身份居留會產生好多隱形成本，譬如睇醫生嘅費用會比本地人高，無法申請只限本地人嘅特惠車票 / 交通津貼，到底薪金係咪足以Cover埋呢部分呢？
發展方向：有冇適應期？萬一去海外真係發現自己唔適合有冇回流安排？如果離職，係繼續留喺當地搵其他職缺定係返嚟？
日本
作為旅遊熱門地，喺求職同生活層面上就相對冇咁多好評。好多人都認為呢度生活壓力大、職級觀念重且工時長，但事實上近來都有唔少去咗當地工作嘅朋友反映返都好睇地區同職種，如果係傳統大公司嘅文職，都的確係仲有好多「陋習」，但如果係講緊初創公司或關西地區嘅公司就會相對好啲，尤其係令唔好杯中物朋友怕怕嘅酒局、二次/三次會文化已逐漸式微。
但無論如何，以下幾點都係必須注意：
- 三大守則：時、守紀律、不能越級
- 強調一致性及團隊精神
- 日文要流利 文職要熟悉係商務用敬語
- 要用間接式表達意見
新加坡
去過當地工作嘅人都認為工作環境同香港有唔少相似之處，大家都係衝衝子，做嘢同講嘢都追求快同有效率。兩地最大不同之處係新加坡走菁英主義，亦即係實力至上，競爭非常激烈，初到埗唔好期望有人慢慢教。而困擾唔少外地人嘅Singlish其實就唔係必學，重點係同平時同當地人交流要有關鍵字，對方聽得明即可，唔需要執著啲語法。其他要點就有呢啲：
- 多元包容
- 英文不能差 尤其係讀寫能力
- 重視個人能力 重視結果
- 注重流程、紀律、法規
- 以直接方式表達喜惡即可
澳洲
同香港有截然不同嘅唔單止係季節替換嘅時間，當地人對工作嘅態度都同亞洲文化大不同呢！佢哋唔會將工作放喺第一位，更重視個人健康同家庭生活。面試問澳洲人點解應徵，對方都會好老實咁答係為錢！雖然聽落好Causal，但都唔代表去到係咩都可以隨便講、隨便做，尤其係去當地做管理級嘅朋友，切記唔好有「下馬威」、「下屬要聽哂上司話」、「做唔哂就OT」呢啲觀念！留意返以下呢啲要點會更易喺當地立足！
- 幾乎沒有階級觀念 眾生平等
- 一年20日年假
- 非常準時上下班
- 大部分時間都不在意員工穿著打扮
- 部分公司可能有Morning Tea + Afternoon Tea文化
- 辦公時間100%認真工作
