職場約定俗成規矩⚠️應對方法

莫講話係初出茅廬嘅迷途小羔羊，就算係有返十年八年工作經驗嘅人仕都好，每次面對職場轉變又或人事變動，好多時圍內圈子入面啲約定俗成嘅規矩都令人無所適從，尤其係當自己唔係話社交能力高強，甚至係慢熱性格嘅就更加難交到可以傾吓無聊事或收吓風嘅職場朋友，到底點做先可以更加快融入又有啲咩情境係早有預備會更好呢？就等下文同大家一齊探討啦！

❓新入職一定有Welcome Lunch

通常新人到都會由上司安排食返餐Welcome Lunch，但係咪事必一定係入職第一日就食，同埋係咪必然唔使夾返份就唔好太過老定！除非事先有講定，否則第一日返工點都帶定啲小乾糧如蛋糕、麵包喺身，唔好帶飯亦唔好帶杯麵，因為公司唔一定有夠熱嘅水，初嚟報到唔知去邊度倒湯亦都好麻煩！如果見咁上下時間大家都冇咩表示，甚至啲同事開始預備叫外賣/傾出去食咩都要嘗試主動加入，呢啲位係搵飯腳同認識同事嘅最佳時刻！

❓上司同事生日要有表示

要唔要幫對方慶祝真係睇成個團隊氣氛同交情，有搞手問起又人生路不熟嘅都係建議Join，有錢銀考慮嘅不妨直接同搞手講，因為夾錢買禮物買蛋糕真係可以好貴，尤其人少嘅Team要平分一個蛋糕錢都分分鐘每人要拎一餐午飯錢(約$60-$80)㗎！如果冇搞手而又明知個別要好嘅同事/上司生日就個別約食飯 /送禮物啦，一高調地慶祝就預咗會搞到其他同事，開咗個頭就可能以後都要負責做搞手，Enjoy做就冇問題，社恐就不了。

❓Team Building增進感情

呢樣又係好睇公司文化，有啲熱情+熱血嘅會搞好多特別活動譬如話行山、露營、水上活動甚至海外旅行，如果本身體能&社交值=0嘅都真係幾頭痛，不過遇著呢啲情況又想合群都有好多選擇嘅，比如話提出照去但喺岸邊同大家加油、去終點等大家一齊去食飯都係折衷嘅方法。但其實大部分情況都係一大班人去食餐飯或搵Party Room唱下歌打吓牌咁，享受當刻就得，都唔使認真諗點樣增進同事之間感情嘅~

❓公眾假期點請假

咁要睇公司部門本身有冇制訂啲咩實質規則。如果冇講明係先到先得制 / 抽籤制，部門人多又大部人都鍾意「請一放四」呢啲假期，而請假又冇特別原因譬如話係紅事白事，一律都係建議愈早講愈好。同埋，記得請AL係唔需要解釋咁多，假設係諗住請假去撲飛、打機呢啲更加係一日未放都唔好同身邊人講！新仔亦要有心理預備一般情況下大肚婆、有細路嘅同事都易啲批假，返編更制嘅更好大程度上會就咗佢哋先。係唔公平㗎~所以如果真係有需要放指定日子，與其同啲同事嘗試自行解決，倒不如真係快手同上司傾！記得，「已經買咗機票」、「已經訂咗乜乜物物」呢啲「理由」係禁語，永遠唔好嘗試猜度主子嘅心意，萬一當日對方心情唔靚，覺得咁樣係「威脅」佢就唔好啦！

❓升職/散水要請食餅

升職都有好多種，助理升做初級、初級升做高級呢啲未有咩實質管理權力嘅，乜都冇表示其實真係冇咩所謂。但如果係升做管理層，由昔日戰友變成上司下屬關係嘅，唔請食飯(人多起上嚟真係好大筆錢)咪考慮萬歲吓下午茶/廢水囉~唔一定收賣到人心㗎，咪當純粹俾個理由大家偷個閒囉~

至於好大爭議嘅散水餅，覺得要派嘅人普遍都係想「好嚟好去」，留個好印象俾留下來的人，而覺得唔需要嘅就認為大家都冇欠大家啲咩，點解走都仲要花多筆錢去感謝嚟感謝去呢？雖則兩邊都有道理，但實際上派唔派其實都好睇年資、職級同以往點做開，冇理由返咗一星期就唔撈都要派㗎係咪？而當中又以約定俗成佔比最高，就算係一年兩年Contract工又好，短至暑期工/Intern都係人派我派，且多數都係各家自派門前餅，熟嘅派靚啲，唔熟嘅就派平啲。高層走就甚少咩表示都冇，簡單如全公司一人一件蛋撻/一人一支果汁，亦有見過派一人一盒+手寫Thank you卡。但千祈唔好比較，唔好見有人請食名牌子就覺得一定要跟，呢啲嘢量力而為就得，尤其係人材流動得快嘅公司，大家個個月都食兩三次餅，根本就唔會介意！