世界職場知多啲（二）英國 ‧ 加拿大 ‧ 台灣 ‧ 韓國

繼上次同大家一齊認識多咗日本、新加坡、澳洲嘅職場文化後，今次就會去睇睇另外四個都多人討論甚至係移民去嘅地方：英國、加拿大、台灣及韓國，到底平時去旅行嘅所見所聞，同實際喺當地生活以至工作有幾大差距？邊度嘅工作環境先最適合I人？E人？希望各位有意去外地工作嘅朋友睇完下文都多多少少有啲概念，認識多啲一定係利多於弊！

英國

相信80/90後身邊都總識得幾個舊同學/朋友仔移民去英國，再唔係睇討論區都有好多人分享自己見聞，有人話慘到要回流(呻嘅內容包括冇嘢好食、好難搵到交心朋友、分唔到對方講笑定真Mean)，又有人話好享受呢邊極著重Work Life Balance嘅工作模式……其實講到尾，從事嘅職業及個人際遇嘅分歧會直接影響觀感，千祈唔好盡信人哋話咩所有歐洲職場都係效率極低，英國人好鍾意Small Talk呢啲片面印象啊！

‧ 同事間要互相尊重、保持禮貌，經常講Please及Thank you

‧ 守時，返工必須早到，放工亦必須準時走

‧ 要OT都寧願早返少少或拎返屋企處理，盡量唔遲走

‧ 同客人/同事開會或傾工事入正題前要有一兩句關心問侯

‧ 只於工作時間做事，放工及放假盡量唔講+唔處理工事，公司亦會要求員工定時放假

‧ Lunch Time 大多數人都係自己帶備簡便午餐如一份三文治

‧ Chit-Chat情況其實同香港Office相近，記得同唔熟嘅人真係傾無關痛癢嘅事就好

‧ 放工去酒吧嘅職場文化都仲係有，其實去到唔飲酒都OK

加拿大

作為移民大國，加拿大非常樂意接收來自世界各地、有不同種族及文化背景嘅技術新移民。當地公司請得香港人去佢哋公司做嘢，就好可能意味住內部亦有印度人、美國人以至南非人等。因此當地職場對於種族、性別、性向同宗教嘅話題係相當敏感，大家選擇嚟加拿大工作，就一定要學習如何齊齊擁抱多元文化！

‧ 著重Work Life Balance 大多準時放工 但部份公司OT情況嚴重

‧ 誠信非常重要！一個自以為無傷大雅嘅謊言足以成為解僱理由

‧ 午餐時間短甚至係冇

‧ 有Coffee Break / Chit Chat文化 期間應盡量避免用母語同自己人傾談以免誤會

‧ 未相熟就盡量唔好問偏私隱嘅問題如對方人工幾多？屋企廚房幾大？

‧ 唔少Office工都有夏令Friday早放 / Causal Day文化

‧ 搵工 / 跳槽 / 升職都講求人際關係

台灣

成日講笑話飛去台灣分分鐘都快過由柴灣入屯門，咁到底飛去近近地嘅台灣除咗有地理同語文優勢之外，係咪真係咁適合大家過去打工呢？坦白講，如果係經常留意當地新聞嘅，或多或少都會感受到當地職場文化都係同香港大同小異：工時長、福利少，但台灣薪金同生活物價水平就明顯較低，人情味又較濃，同當地人共事壓力相對較細，唔係特別大物慾嘅朋友、又或係想累積一啲罕見職業嘅工作經驗，甚至打算留喺當地長住都可以諗諗！相對地，追求賺錢至上或單純係想改善待遇嘅就要認真考慮喇！

‧ 工時長而且OT冇補薪係常見事

‧ 講求團隊合作 同層競爭相對溫和

‧ 階級觀念明顯 要稱呼上司/老闆「X董」、「X哥」、「X姐」

‧ 同事之間愛講八卦 內容五花八門，可以由日常瑣事、娛樂講到去政治

‧ 年輕一輩開始十分注意維護工作權益 敢於發聲

‧ 餐飲 / 服務業特別著重人情味 突發事件或投訴要彈性處理

‧ 用字上有時較婉轉 如「先不用」、「沒關係」其實係「唔需要」嘅意思

韓國

千祈唔好因為想追星更方便，或者純粹係因為睇劇覺得一個地方好風光就貿然衝去生活！韓國嘅「忙內文化」相當根深柢固，雖然都有報導指有啲新企業及由新一代接管嘅公司開始陸續改善，但強調長幼尊卑呢點短期內都冇咩可能立即改變，新人到埗必須完全服從上司及年紀較大嘅同事命令。而且當地人職員比例多嘅公司更會有排外現象，未修讀過韓文嘅迷途小羔羊非常高機率做唔夠一年就捱唔到落去！

‧ 階級觀念超級無敵重 年紀愈大同入職時間愈耐嘅人先有話說權

‧ 唔應該直接表達個人意見 要盡量同其他同事做一樣嘅事

‧ 只要係上司要求 即使唔係工作範圍內都要服從

‧ 就算冇工作都要等上司離開先可以放工 OT程度嚴重

‧ 有聚餐文化 只要上司叫到必須出席

‧ 注重個人包裝 返工要著得靚靚 即使係男仕都可能被要求要化妝返工

‧ 部份人仍有歧視女性、歧視外國人嘅心態 會刻意刁難、針對