呢個話題真係長期都見有迷途小羔羊喺討論區展開激烈辯論，常見情況都離不開覺得現任公司有問題、人工過低、工作內容唔適合、人事夾唔到同影響到身心健康……當然，以上任何一個問題都唔可以一概而論同應該正視，當覺得煩惱除咗搵朋友/屋企人甚至係前輩傾吓計，亦可以好似而家睇呢篇文章咁，參考其他陌生人意見再作分析先作出決定！
誘因
在此先不論係心郁郁坐唔定 / 有朋友介紹筍工 / 為錢為Title呢啲咁「飄」嘅因素先，轉工甚至轉行其實都有分被動同自願，譬如話以下呢啲情況就係目前對現職公司冇不滿但有機遇：
- 所擁有嘅技術/專業知識係大勢，四面八方都搶人材中
- 有其他公司 / Job Hunter招手
- 心儀公司招聘中
遇到呢啲機會，第一步絕對應該諗清楚自己想唔想走先！唔係有人用高薪厚職吸引就等於適合自己，尤其係其他人(無論係朋友、親戚又抑或係前同事前上司)介紹嘅一定要打醒十二分精神：上網做資料搜集睇間請人中嘅公司同獵頭公司有冇伏、去各大平台睇真啲招聘內容同行情、了解清楚自己係咪要同介紹人一同工作甚至係合作關係呢啲都係必做嘅功課！如果現任公司待遇滿足到自身需要，又有足夠發展同發揮嘅空間，繼續留低保住份好工啦！
至於被動考慮要轉工嘅朋友，例如係遇到/已經進入以下呢啲情況：
- 夕陽行業如紙媒；現任公司有即將結業嘅趨勢甚至決定
- 肯定停留現況再冇晉升/發展空間
- 工作量過多或工作內容不匹配，導致身體發出警號
- 不滿被調動至其他部門甚至分派至分公司
相信各位都心裡有數知道只要中是但一樣都一定要走，而當中特別值得一提嘅係，身心健康呢個誘因向來都難以有實質數值去判斷，不過當壓力過高嘅病徵如偏頭痛、腸胃痛、長期冇胃口及失眠等出現，就真係要問自己係咪放個假休息/去個旅行就可以reboot返個人。如果唔係，就同上司商量一下係咪可以調整工作量甚至真係轉工啦朋友！就算再好賺都唔夠支付醫藥費，捱壞咗個人日日行屍走肉，將來有咩好機遇都冇本事拎起！必要時寧可節衣縮食少少，轉行/搵份低收入但輕鬆啲嘅工，一啲都唔可恥㗎！記住係要生活，唔係生存啊！
判斷：公司背景
好多人都會問：「人工加30%、升職轉去新開張細公司；留喺現職大公司，話會額外出10~15%花紅同年尾加人工5~10%，冇得升住，點揀好？」面對呢類人生交叉點，根本冇100%令人滿意嘅答案，而係睇個人底線同性格去做選擇，接受能力高又鍾意挑戰嘅，會覺得唔跳走去升職加薪就笨；而保守派或有好多責任(供樓、養妻活兒、盡孝、進修ing etc.)喺身嘅，跳走就有要面對工時長、唔適應、唔穩定等極大風險。
所以與其問其他人點做，最最應該嘅其實係問自己呢3個搵工重點，自己接受能力去到邊！只要其中一個唔符合，都唔應該衝動Take Offer！公司背景唔單止係講佢嘅資金/收入來源來自邊度同是否穩定，仲有佢嘅規模、架構、工作模式同位置等全部都要納入考慮範圍！一開始唔知由邊度諗起，咁就由呢個簡單問題開始：由以往可以行路返工，到新工要來回3小時交通時間，OK嘛？
判斷：薪金及福利
而人工、花紅、福利同年假日數就真係要多參考同行朋友意見同市況，獵頭公司幫手嘅一般都會比出面自己搵嘅高少許，其他公司挖角嘅亦應該高於市價，最好嘅參考指數係每年公務員加薪%！如果係轉行，好似之前疫情期間空姐空少落地/Sales轉做文員咁，就要當自己係白紙咁計，而且好多公司都會用底薪去計人工，過往啲咩交通津貼同其他福利都要清零！
判斷：工作內容
最後亦係性命攸關嘅工作內容，就算人工加50%，但由5天8小時工作變成996工作制，24小時On Call 仲要 On Shift 真係唔人人接受到！就算唔講得咁兩極，譬如話係轉入初創公司咁計，就預咗風險大；跳去新公司話升去管理層，但手下得1個人，大部份工作依然要親力親為；由好忙變成好悠閒，日日扮工又係唔係自己所喜愛嘅工作模式？
留意：跳槽陷阱
呢個世界可能真係有「我都賺夠喇，都想畀其他賺吓」嘅人，但絕大多會講呢句嘅都係騙徒。挖角時講盡好說話係「正常禮儀」，都想叫人去自己度，冇理由仲黑口黑面、諸多阻攔，但到真係埋牙簽約又係唔係完全同當初傾好嘅一模一樣，完全冇開空頭支票？係唔係人都開始返埋工就一定咩陷阱都冇？不如大家一齊睇吓呢啲 Cases，盡力避免自己做咗嗰個好傻好天真嘅人啦！
Case 1
獵頭公司Cold Call，新公司答案加 20% 薪金吸引剛開始供樓嘅事主跳槽話幫手搞新Project，點知入職後先知原來個 Project 份標書都未簽成。結果外國老細話冇其他位置需要用到人，補足7日錢炒咗事主 (即睇連結)
破解方法：轉工有風險，就算唔係畀人炒都有機會做落發現唔適合自己。每月有供款呢啲情況下，當初應該更謹慎地了解新 Project 詳細先決定，新公司同獵頭公司對口照理唔會亦唔可以呃人話已成功中標。
Case 2
事主以為自己搵到份好工，假多又易請假仲跟公務員個制度加人工，但入職後先知上一手離職係因為工作量太大。每人每月原來要負責跟成30個大Project，食飯冇時間仲要拎返屋企做 (即睇連結)
破解方法：呢類情況真係常見到不得了！其實真係無解，一日未入職，內部情況都未必可以咁快知道得一清二楚。而家可以做嘅係再轉工，冇經濟壓力嘅話盡快襯未過試用期裸辭！
Case 3
新工好急住要人，想事主盡快返工，所以事主決定自己賠半個月代通知金走。點知轉頭新公司通知佢因內部人事變動唔請人，但舊公司又已經完成哂離職手續，頓時變成失業人仕。(即睇連結)
破解方法：好多人同情事主嘅同時都質疑點解唔簽新約先遞信，但事實上好似Case 1咁就算做齊哂入職手續，公司都可以用架構重組呢類原因出一、兩日人工之後叫人走。惟一可以小心啲嘅位係，當新公司要求提早履新，大家係可以嘗試要求對方支付代通知金，而唔係自己獨力承擔。
