隨住暑假嚟到，為咗賺取工作經驗同錢錢，好多學生都會積極搵夏季實習機會（而且都好大機會已經搵到）。不過每年暑假過後（呢一刻都有好多人上Threads分享求職故事啦~），都總係有唔少人話因為第一次求職、唔認識勞工法例等原因而引申出各種誤會同糾紛。到底返暑期工有咩地方要注意，又有咩方法可以避免墮進陷阱甚至上埋新聞？以下一齊探討吓啦！

好多人都想體驗返主題樂園 / 特別活動，但一定要留意工種是否需要戶外工作同自己體力係咪應付到啊！

1. 搵工

通常暑期工都離不開透過學校搵與學科相關嘅工作機構實習、搵短期出現嘅工種如書展/動漫展 Event Helper、或係以賺錢為優先、出賣體力就可以嘅外賣仔、飲食業炒散（唔講補習啦~唔係暑期獨有）。

首先，大家要目標為本，諗清楚係以賺經驗定賺錢為優先，前者建議喺市場上有一定公信力嘅平台，或直接去相關公司官方網站上面搵，而後者則要千萬個小心！
莫講話就算有朋友（尤其係朋友嘅朋友）介紹都唔好仆去，大家千祈唔好輕易相信Facebook、Instagram、Threads等社交媒體上嘅請人廣告，更唔好貿然答應陌生人嘅邀約！相反大家可以善用呢啲平台去查清楚對方底細，有時表面係正經公司都可以係請人去做Cold Call、層壓式推銷或者有個痴線分店經理！常見請人請得勁密嘅倉務執貨、打字員呢啲，自己可以上網查查到底伏位喺邊！

此外，某啲暑期工有機會要求大家以自僱嘅身份簽約！咁樣安排嘅話，就代表你唔係以「僱員」身份去加入呢間公司，你將會失去《僱傭條例》嘅保障，包括唔會享有《最低工資條例》嘅權益、唔會有工傷補償保險同有薪假期。 

2. 合約仲有，第一次返工嘅朋友仔一定要留意返，僱傭條例係有講到「僱主必須將一份僱傭合約副本給予僱員參考及保存。如僱傭合約並非以書面形式訂立，而僱主在該僱傭開始前收到僱員的書面要求，則須將一份載有聘用條件的通知書交給僱員」。意思係大家簽約時（如有）應該係簽兩份，一份係僱主Keep，另一份Copy係要到自己手，如果冇就要主動提出，僱主違反呢個規定係可以被罰款㗎大家簽約 / 協議時記得睇清楚合約（再Hea嘅工都一定要盡量諗方法留低白紙黑字嘅證明！如電郵、社交媒體上嘅對話記錄或錄音），上面應該清楚規定工資及貨幣種類、支付日期以及支付方式。睇到合約上有唔明白 / 唔肯定 / 覺有不妥嘅地方記得唔好怕麻煩，記得問清楚負責人甚至係家長同勞工處！

3. 工資

相信$$一定係各位同學仔極著重嘅搵工條件，而無論大家做咩工種同埋工時為何，根據《僱傭條例》，僱主必須按時支付工資，通常係每月或每週支付一次。任何情況下，僱主都不得遲於工資期屆滿後7日出糧。而且僱主係唔可以亂咁扣糧，例如話遲到早退、因疏忽或失職而損壞公司貨品、財物或設備等情況都只可以有限度同有條件地扣減！

萬一唔好運遇著拖數拖到天荒地老呢啲Case （最近嘅俵俵者係友利冰室……），只要僱員超過1個月仍未獲發已到期嘅工資，係可以視之為已被僱主終止合約，僱主需要支付返代通知金同其他賠償（包括欠薪嘅利息）。當然，呢啲時候大家係一定要去勞資關係科分區辦事處落案，情況惡劣嘅仲分分鐘花時間、花心力上勞資審裁處追討！

4. 工時Sad but true……香港現時並冇法定條文規範標準工時、最高工時、超時工作限制或超時工作薪酬。但係！暑期工嚟講，如果係年滿15歲但未滿18 歲而且係受僱於工業經營，就符合「青年」定義，可受到《僱用青年（工業）規例》保障！呢條規例係有法定限制每日最高工時、每星期最高工作時數及連續工作時數上限等，而且仲有講明唔可以用青年去做危險工作、搬過重物品以及有休息日安排！雖然理論上應該唔多學生同僱主會咁樣安排，但知多一啲冇壞啊！

5. 休假安排

喺之前嘅文章都有討論過就不作闡述，大家可以請移玉步去返相關文章度睇睇，尤其係惡劣天氣下嘅注意事項，畢竟暑假呢段時間都係打風/天氣唔好嘅熱門日子！