坊間咁多大大小小炒散群組，尤其係飲食業成日都叫要人炒散，到底咩係炒散同埋點解要揀炒散而唔搵長工呢？炒散又有咩地方係要留意？下文同大家一齊討論吓！

🔸炒散優點？

👍🏻炒散其實即係臨時工，通常都係計時薪或日薪，工作時間同日子因應僱主同「散仔」嘅需要而編排，一般嚟講都係長假(如嚟緊嘅復活節、年尾聖誕節)時特別多炒散空缺。由於呢種返工模式自由有彈性，又多數冇咩特別技能要求，唔似一般朝九晚六工咁只可以同其他人一齊放公眾假，請個假去旅行又有多番程序要跟。難怪不論年齡同工作經驗：想進修、想追夢、想賺快錢嘅人都對炒散感興趣。

👍🏻炒散雖然以飲食業為主，但有時都會有特別活動助理(譬如書展)、臨時演員及Sales等工作，工種包羅萬有，新鮮感同挑戰性十足，再再再加上薪金好多時除開會比一般簽約嘅長工高，所以炒散一直都有供有求，甚至可以話係搵快錢不二之選。

👍🏻有啲特殊情況下，炒散仲可以作為跳板，喺相應行業先拎到實際經驗作以後求職時嘅優勢，甚至當公司出現正職空缺時，一直炒散都表現得唔錯嘅話，都可以主動 / 被上司要求加入成為正式員工。

🔹盲點

好多人都以為炒散可能每個月先返得三四日工係唔需要買保險亦唔需要供MPF，其實係一種謬誤！無論咩工種僱主都要為合約制員工買保險(如果係Freelancer，講明計你自僱又係另一件事)，尤其係第一次合作 / 預期有機會長期合作嘅僱主，千祈唔好介意多口問句，唔好等到真係出意外時先發現原來對方一直都犯緊法！仲有，如果係返飲食業同建築業，返一日工都好僱主都係要供MPF，至於其他行業就有另外計法。

🔸炒散缺點？

👎🏻如果大家有留意新聞嘅，可能都對之前五星酒店炒散蛇頭公開個人私隱呢件事有印象。雖則話事件公開之後大家都會更加警惕，但無可否認嘅係呢種搵人炒散嘅模式唔會有完美嘅替代方式，遇著唔好彩信錯人就唔單止係冇工開咁簡單，返咗工但追唔到糧同個人資料會唔會被盜用都成問題！

👎🏻返炒散工亦要適應孤獨，要知道同事之間、上司之間好多都係萍水相逢嘅關係，可能係一段時間內大家日日見面、日日炒場，感覺好親近，但炒完呢個星期就永不再見，即使交換埋聯絡方法亦大概率因為冇共同話題而慢慢淡出大家嘅世界；再負面啲，亦都可能因為冇足夠時間接受培訓，到實戰時要飽受同事&客人嘅冷言冷語，EQ差啲都隨時爆煲。總而言之，炒散世界入面難有真愛，自問係純情底或者係初出茅廬嘅畢業生，想喺職場上識到真心同交心朋友，寧願搵份起碼有半年約嘅合約工都唔好選擇炒散。

👎🏻假設搵炒散工向來都係透過有可信性嘅網站甚至係親身見工，本身個人又係獨行俠性格，以上種種全部都唔係問題？留意返，基於勞工法例「418原則」(亦即係連續受聘於同一僱主；工作連續四星期；每週工作超過18小時)，有部分僱主為咗避免要計有薪假、疾病津貼等福利而故意將炒散時間編到「剛剛好」，換句話講即係你願意返得多都唔得！所以若然當初係一心想追求高薪，就分分鐘要同時炒兩三份工先可以達成願望喇！

👎🏻最後就係關於返工時間自由呢個Point，大家有冇諗過呢樣嘢其實係雙向？炒散有得揀幾時返工，僱主都可以揀幾時需要人返工！比如話炒開酒席嘅到鬼節就會進入淡季，特定活動又有期限，變相收入時高時低，純賺零用錢嘅心態就無咩所謂，但想依靠炒散份人工應付生活開支，倒不如返份時薪低啲嘅正職更實際！