上一篇2024趨勢就講到新世代同大疏離潮下員工係偏向對公司冇歸屬感、做咩都提唔起勁只願按章工作，咁係咪冇方法提升返士氣呢？除咗從薪金、福利及改善工作環境等方面著手之外，大家仲可以考慮做多少少Team Building活動！以下會為大家介紹多種團隊活動，無論身為中高層、公司HR抑或只係被抽中嘅細路，公司活動搞手都可以參考！
Team Building係咩嚟？咩規模嘅嘅團隊應該要搞？
簡單啲講即係團隊活動，同迎新、告別、公司週年晚會、聖誕聯歡會有截然不同嘅目的同風格，主要係想令到已經就職一段時間嘅員工們有更好嘅合作能力，而且一定要訂立一個目標，譬如係Marketing Team同Operation Team想更有效地溝通、新加入Team Head想同下屬建立互信關係……一般情況嚟講，群組人數愈多愈唔見效，想像吓約一班朋友食飯，超過20人嘅飯局又點可能每個人都有充足嘅相處時間呢？
幾時同應該點安排？
預算唔多嘅初創 / 小公司簡單聚餐都可以，但唔推介揀大家要走嚟走去嘅自助餐
全年365日都可以做Team Building，想做嘅時候做又或者係每年都訂一個固定時間去做都可以。最重要係了解清楚活動嘅目的、Budget及一眾同事嘅意願，I仔或者只係想參與靜態活動，E仔就想揀戶外活動，但無論係咩性格都好，可以肯定嘅係——冇人會樂意自費及用公眾假期甚至扣假形式去參加公司活動！
戶外活動篇
講到團體戶外活動，第一時間應該唔少人都會聯想到Day Camp歷奇、城市野外定向，呢兩個選項固然簡單、健康同明顯可以喺一定程度上達到目標，但總不能年年都重覆玩吧！同埋，請考慮清楚係想同事們放電定叉電先？如果平時大家都經常OT又多Project跟，參加高強度活動嘅意慾一定唔會高！另外請密切留意天氣狀況，秋冬先出行就基本啦！都要有心理準備會遇著打風、暴雨，如果日期唔可以改，就要有室內活動Plan B喇！
‧ 本地一日遊
本地遊大有大玩，細有細玩，簡單啲可以行吓山、釣墨魚、去郊野公園BBQ加少少團體Game、去主題樂園玩小遊戲**……留意返，報一日團雖然方便但除非係旨在聯誼，否則強烈建議一定要叫同事們自己Plan行程！
海外遊亦都唔建議，表面睇花費咁多錢錢，同事應該好高興先係，但實際上平時大家返工都日對夜對，唔係咁多人會喜歡放假都捆綁埋一齊！而且海外遊因為要過夜，比較I、高敏嘅朋友仔會容易覺得被侵占私人空間，唔好話變成深交，分分鐘絕交都有可能！
互買禮物比賽可以考心思同創意！
**去主題樂園都要計劃少少活動，分組鬥收集得多某樣嘢嘅照片、鬥快完成指定任務、用有限Budget為對方買禮物……千祈唔好一到埗就散水各自玩，0實現Team Building！另外亦要注意水上樂園同哈囉喂活動未必全部人都啱玩~
‧ 療癒身心嘅親親大自然活動
野餐都好Chill~
去室外玩唔一定同運動掛勾嘅！坊間近年多咗好多旨在放鬆身心、遠離煩囂嘅活動如參觀農莊、森林浴、品茗 × 頌缽、動物義工等，同事們可以藉此機會去做一啲「不尋常事」，過程中大家可以傾訴吓心事、分享吓內心世界甚至係反思平日為人處事，話唔埋會意外發現大家只要轉換一下思考模式就可以互相理解，以後返到公司開會就唔使再激烈辯論都可以得出好結果！
室內活動篇
室內活動嘅好處係可以免除天氣因素，而且千祈唔好覺得室內就一定係悶、文靜Type，其實香港好多運動都可以喺室內場玩例如攀石、衝浪、彈床同射箭！如果真係想靜，包個時段一齊睇場戲、煮飯仔、學畫畫亦得！
‧ 密室逃脫
介乎於好動與文靜組之間，單係靠體力或智力都未必可以成功逃脫，剛好可以兩Team人混合組隊進行時間 / 分數比賽！呢個過程可以促進溝通，令彼此更信任對方，平時話語權比較大嘅Team嚟到遊戲唔再有優勢，大家從中可體會到聆聽同採納多方意見有幾重要！
密室逃脫每節時間多為45分鐘至1小時，既然玩得分組就唔爭在玩多一兩場變成爭霸戰如4組Foul兩組時玩簡單，2組Foul一組時玩困難，輸咗兩隊打場友誼賽，活動總時間為2小時左右，之後去食飯進行埋頒獎儀式都只係佔用咗半日時間！
‧ 劇本殺 / Board Game Party
呢類遊戲最大好處係大部分時間都可以坐住玩，對懷孕中、有傷患等需要嘅同事特別友善，加上主題眾多：恐怖、奇幻、懸疑、童話甚至宮鬥都有，同事們平時都鍾意鬥智鬥勇就啱哂！以一場10人參與嘅劇本殺遊戲嚟講快則2小時，慢則3至4小時走唔甩，完場最好事先安排埋附近食飯做個賽後檢討；Board Game Party方面就可以搵Party Room或徵用公司Meeting Room （但多多少少會有啲罰留堂Feel），到時叫埋到會 / 外賣邊食邊玩都仲得！
‧ 興趣班
只要大家唔抗拒，一齊上瑜伽堂都OK！
室內興趣班真係多到想報都報唔完！唔計上面都有提到嘅烹飪同Art Jaming，市面仲有好多有趣選擇！假設已知大家都鍾意間唔中放工去飲兩杯，可以玩精釀手工啤酒工作坊或安排參觀啤酒廠；一齊去整吓陶瓷、皮革、銀器既有成品拎返屋企，仲可能意外發現大家有創意同品味相近嘅一面！
