辭職⭕DO AND DON’T❌

無論係做Part-Time、簽幾個月 / 幾年制嘅合約員工，又抑或做緊全職都好，天下無不散之筵席，大家都總會面對有朝一日要同現職公司說再見，但著手辭職嘅第一步並唔係寫辭職信！到底要做啲咩準備同埋點樣先可以做到雙方和平分手嘅同時，又保障到合理權益？以下就同大家一齊探討：

辭職原因

辭職原因有千千百百種，於冇簽特定條款嘅情況下，原則上員工只要跟足程序離職，無論交咩理由出去，公司都只可以接受而不可拒絕。但大家要分清楚嘅係乜嘢先係辭職嘅真正目的？係已經搵到新工同人生有新計劃？純粹不滿公司各樣安排及人事問題？想藉機要求升職加薪？如果唔係有100%冇得傾嘅理由，就要預備好當通知上司甚至更高層時，對方可能會提出一啲方案去解決「問題」，到底去到邊個位就接受又或者要點推搪，遞信前一刻就一定要充分考慮。

常見留人招數：

• 調部門 / 調去跟另一個Project / 調更
• 加薪 / 計多啲花紅
• 做到某個條件就升職
• 會同相關同事溝通吓點解決，建議留多陣觀察下

正式通知

肯肯定要辭職就要正式通知各單位，就算要走係因為同直屬上司有關都好，不論咩情況，遞信去人事部前都要應該要知會對方一聲先，尤其係有咩特別條件要斟，譬如話想提早走、唔想扣AL想補水甚至係想走之前改Title，呢度都一定係第一關！

但當然辭職亦唔係口講同咗上司講就計數，當雙方都口頭同意安排就一定要白紙黑字by email / by 一封信去確認，HR亦有可能因為唔符合公司規矩或勞工法例而會推翻一啲私下協定，總之最後離職日一定要同老細 / HR傾清楚，千祈唔好靠估亦唔好諗埋啲奇招去提早完約。

比如話之前討論區就有人問返新工做兼職，未夠一個月係咪可以遞完信然後瘋狂射波7日就唔使補代通知金？答案係要視乎返份合約本身有冇特別協議話係可以咁做，如果冇就睇中唔中418 (連續受僱於同一僱主四星期或以上，而每星期最少工作18小時)，中咗就一定唔可以唔返工又唔補水，唔中嘅雖然大機會真係可以就咁走人，但喺一個行業入面個名聲唔好，譬如話係餐飲炒散咁講，要之後再有人敢請敢用都唔係咁易！

辭職信

去到將離職日及其他錢銀上嘅問題都解決哂就真係要send正式嘅辭職信，雖則話網上都大量Sample可以抄，不過當中都唔係冇學問嘅~整體嚟講都係要簡潔、大方，詳情會喺下一篇文章度再分享！

離職DO AND DONTS

進入咗等離職期好多人都會形容為好似食咗無敵星星咁，某程度上都的確可以咁講，但唔想最後留個壞印象甚至無意中做咗違法行為就要注意：

– 公司所有借出物資都必須如期歸還，包括但不限於卡片、 LOCKER/大門鎖匙、電腦、電話
就算對方唔記得，都唔代表唔使主動還！切記電腦同電話入面嘅資料係屬於公司嘅，本來都唔適合用嚟處理私人事務，所以唔好以為可以隨便刪除入面任何嘢！

– 通知相關同事及客戶
唔係叫大家將「我唔撈喇」不停掛喺嘴邊，而係做好Handover呢件事咁解，相關人仕早啲知之後相關工作聯絡邊一位接手，就唔使搞到Last Day或之後都仲要忙左忙右去交代！

– 分批清理家檔

同一份工撈得愈耐，私人物品就會愈積愈多，望住堆物品唔知點算好？千萬唔好抱住到時先算嘅心態去執！愈係多嘢就愈要提旱開始清理，當中話唔埋會發現一啲重要文件之類！Last Day最後只剩返水杯、少量文具就走得輕鬆，同班戰友去邊食最後的晚餐都OK！

– 不可曠工

*都莫講話遲到早退，公司其實都仲可以出警告信，曠工唔單係冇糧出咁簡單，分分鐘仲構成埋合理原因畀公司即炒同索賠！

-工作證明

最後一日填完離職問卷(如有)之後HR多數都會出埋工作證明信，如果先前有同公司傾好有推薦信又未收到嘅好盡快追！