【入職篇💼教科書冇提5件事】

成功獲得入職機會，當然值得開心啦~但除非大家已經身經百戰，否則返工 / 轉工第一日甚至第一個星期，點都會有啲緊張係咪？而家就等我哋同大家分享吓初入層5件事，等大家做定多少少心理準備，可以輕鬆多少少咁返工甚至係判斷份工適唔適合自己啦！

• 如何認識同事 👥？

一般嚟講，都會由上司直接介紹。初到埗切忌衝出去識人！唔係怕唔怕尷尬嘅問題，而係邊啲係同自己同一Team都未分得清，成個Office勢力分佈又未知，八卦同鐘意講是非性格嘅又總有一個喺左近，一陣唔小心講錯嘢或者搭錯訕，做成不良印象就無謂。乖乖地，一開始坐定定自行觀察吓成間公司氛圍&同事之間關係好過~

圖Source (Caption: 第一日返工強烈建議唔好帶飯！首先可能有啲公司/部門會同新人去出面食飯互相認識吓，就算冇呢類飯局，都總會有同事出去食/買外賣，呢個就係識人嘅好機會！)

• 幾時拎私人嘢返工🧸？

返工9成9要拎嘅第一樣私人物件係咩？紙筆呢啲一般公司都會有，就算冇都會借到，所以私人嘢嚟講，真係捨杯其誰！頭兩日就一般都會先拎買支水睇定啲，一嚟分分鐘個位未坐定會被安排換位，再講如果返咗一段短時間發現份工不似預期，要走都可以輕便啲~但返超過咗一個星期好開始陸續拎些少個人物品喇，好似杯呀茶包呀咖啡呀餐具呀叉電器呢類，始終有啲嘢冇喺手唔方便又唔可以一直問人借。而且好多人都信奉放愈多私人嘢喺位就代表對間公司有歸屬感呢套，覺得份工冇咩大問題會一直做落去咪順其自然執靚個位~~

圖 Source (Caption: 分分鐘啲小擺設可以成為打開話題嘅小工具！)

• 幾時收得工🕧？

網上都見過唔少初出茅廬嘅朋友仔問「急！返新工同事同上司未走，幾時走先適合？」呢啲Topic，其實相信大部分新仔第一個星期都係學嘢階段，公司都唔會有幾多重要到要OT嘅工作俾新人過手，如果真係約咗人或有緊要嘢唔走唔得，不妨直接同上司或起碼教緊嘢嘅同事「單聲」。又如果唔係真係有事要做，純粹冇嘢好繼續扮工，請閱讀空氣啦！睇吓其他同Team同事幾時走然後齊上齊落R下水吹都係職場社交一部分嚟！同埋等同事收工可以同時了解吓呢間公司嘅OT文化如何，見成班都到收工時間都仲係忙到癲，甚至有人講話會做多2-3個鐘先走嘅，就要諗下將來自己點適應喇~

• 一入職就發現冇人教 / 冇同組同事 / 同組同事就離職🙊？

唔係講笑，朋友親身經歷返工第一日就係負責交帶工作嗰位同事嘅離職前3日，亦見識過有人入職時上一手同事已經走咗！聽落好似好岌岌可危？其實都未必嘅，有人出出入入係正常嘅事，最緊要係你要學、要做嘅嘢有冇一個清晰嘅指向甚至有埋101(教學文件)先？有就視乎返公司有冇安排適當嘅時間俾你去學去跟進，萬一真係冇人教又冇方向嘅，就真係要搵時間好好同上司傾傾喇，日日坐喺度白等真係唔係辦法！但如果加埋其他警號譬如話見到啲同事獨狂OT、上司會直接公開地鬧同事一啲無傷大雅嘅嘢，就真係要小心小心小心呀！

圖 Source  (Caption:日日食散水餅兼公司個個同事入職時間都超短 (除非初創又請人開荒啦)就要留神喇~)

• 返工衣著打扮點先好👔？

同返學一樣，有制服咪著制服同埋唔好奇裝異服囉~其實之前嚟面試嗰時應該都偷望到公司入面啲同事大概係走咩路線，冇上門面試過嘅就直接問HR啦。普通非金融系辦公室嚟講要求唔會特別高，不分男女，只要第一日返工唔好著短褲熱褲拖鞋珠片衫超濃妝或唔梳頭就OK，最最最安全牌就係拎定件百搭輕便西裝褸，咁就可以應付到大部分情況。另外，記得因應返公司文化去選擇口罩同衣著，粗口衫呀、某啲顏色嘅口罩唔會明文規定唔可以著/用，唔好貪方便求其著呀！

圖 Source  (Caption:外語衫都唔可以亂著)