加入飲食業前必讀！面試常見5大問題應對方式

唔好成日聽人講話餐飲業超長時間工作，前途又唔明朗，所以就抹煞一個可能係最適合自己嘅工種選擇！尤其係自覺喺服務行業特別得心應手，又鍾意團隊合作同工時相對有彈性嘅朋友，話唔定試過之後就返唔到轉頭！不過飲食業同一般Office文職嘅工作性質有極具大嘅差異，因此面試/工作時會遇到嘅問題都不盡相同，以下就同大家一齊探討！

求職前請細思💭

小店嘅話，簡單清潔、安排入座、介紹食物、落單、上菜、結帳好可能要一腳踢

• 適合自己嘅崗位係前線定廚房？(後勤Admin / Marketing喺度就不作深入討論)
• 工時長、體力需求高，有準備應付到？
• 前線會經常遇到各式各樣嘅突發情況，應變能力同情緒管理都OK？
• 酒店 / 大集團 / 酒吧 / 小店 / 外賣店嘅入職要求可以差天共地，當然待遇同實質工作範圍等細節位都唔一樣，到底自己嘅目標係加入邊種類型嘅餐廳？

做廚房最緊要唔怕由低做起，要預咗咩預備工作都要參與

• 千萬！一定！唔好唔記得！要Check公司背景！大部分本地餐廳都會設有官方IG / FB甚至係官方網頁，多一分了解，多一分安全同成功機會
• 兼職 / 初級職位大部份對學歷冇要求，亦未必一定會安排面對面面試，有可能透過電話或視像同求職者傾幾句就安排試工
• 職位較高如經理、主任級 / 大集團聘請全職員工就多數都會進行面試，要帶簡單履歷表同記得一定要穿著整齊、剪好指甲、梳好頭髮！
• 樓面如識講流利英文同普通話，獲聘機會Up Up Up！
• 如應徵有一定入行門檻嘅職位如調酒師、咖啡師，有相關證書記得要帶齊，亦要預備可能有即時測試

見工ing✍🏻

• 唔可以遲到、對答時有眼神交流、誠實係基本中嘅基本
• 視像/電話面試記得Set好個場，唔好突然有人開房門或有寵物叫聲做背景音
• 主動、有禮貌、表現出肯學肯做嘅精神係大部分飲食業僱主要求嘅員工特質
• 唔好怕麻煩/怕醜，問清楚工作內容、時間、福利、輪班及放假安排等重要資訊
• 如果係去餐廳門店見工，可以藉此機會留意吓其他員工及動線，應徵廚房嘅甚至可以嘗試要求入內參觀

常見面試問題❓

• 點解揀入呢行？點解揀呢間餐廳？
  ✓ 強調自己長處，如鍾意服務客人、鍾意每日都有不同挑戰

  ✓ 表現出了解所應徵餐廳嘅特別之處：譬如係街坊老店、好有人情味；成日都會有新款式推出，自己又鍾意呢份新鮮感，介紹畀客人時都唔易覺得悶

  ✕ 鍾意食嘢

• 呢行好辛苦又要返到好夜，頂得順？
  
  ✓ 嚟得面試即係已有心理準備 (新手：相信公司會畀足夠時間去培訓，自己都會盡快適應；已有相關工作經驗嘅：直接表示之前已體會過，知道自己能力係應付到)
  ✓ 可以順勢問得深入啲工作安排係點，譬如有冇落場時間 / 大時大節及打風係點返法
  
• 有經驗嘅多數都會問到之前遇到最大嘅難題 / 挫折係咩，然後又係點解決✓ 誠實地講出自己嘅經驗，適當地藉機表現出自己嘅應變能力、團隊精神及解壓方式

  ✕ 作故事或講前任老闆及同事壞話

  ✕ 指明道姓提及曾招待過某某城中名人/明星

• 語言能力測試
  ✓ 可以先睇定該餐廳餐牌，遇著有唔識/唔熟嘅食材或菜式名記得Google定

  ✓ 練定英文、普通話基本餐廳會話

• 各種情境題✓ 留意餐飲業最新時事，譬如係啲黑店大全關注組，知道最近有咩案例 / 事件都方便拎嚟做例子應對，亦可以用嚟做危機處理訓練，諗定如果發生喺自己身上又點解決

  ✓ 應徵職位唔係特別高層嘅話，記得要提到會同上司/當值經理商量同報告

  ✓ 如上述，應徵咖啡師 / 調酒師好大機會做實測，諗定兩套方案，一套簡單，一套會令人驚艷嘅，視乎情況應用