求職篇 – 4大貼士💡免墮陷阱

搵工難，唔係難在搵到薪高糧準、唔使點做又唔使負起重要責任嘅工作。事實上搵到價位適合兼自己有興趣，仲要最重要係NON-求職陷阱嘅，過程真係有好多細節位要留意！尤其係歷年咁多新聞，相信大家見到求職者們輕則被騙財，重則被賣去做奴隸、加入騙子行列甚至被賣器官同喪命都幾心寒！在此再次同各位職場新手同老手溫提一下，等大家事前準備CV、戰衣同開咩價錢之外多份搵工貼士！

求職平台 💻

除咗搵勞工處、有一定歷史嘅大型招聘公司同網站之外，而家社交網站上嘅招聘/求人討論區、群組都超級多花款。但坦白講後者嘅伏位真心多，強烈建議大家唔好選用呢類冇咩監管同限制可言嘅平台嚟求職！另外，就算係朋友甚至係朋友嘅朋友介紹都要保持警惕，記得一定要問清楚詳情同唔好隨便公開個人資料啊！

圖SOURCE  陌生人亂Add話介紹筍工，唔好應機唔好提交任何個人資料先係上策！

查核公司資料 ✅

搵到有興趣嘅工作，千祈唔好做衝動仔即刻send CV約面試！事前check清楚招聘廣告內容同公司背景除咗可以預防詐騙，仲有好多好處可以令自己見工時獲得優勢！

CHECK LIST:
– 大公司嘅話要睇公司名、公司網站同公司電郵地址 (Domain / 網域)同官方網站資料係咪相符

圖SOURCE 就好似最近DHL騙案咁，可以樣樣嘢都抄到好足，真係要擘大雙眼睇清楚

– 社交網站度搜尋吓公司名，睇下佢哋嘅最新動向之餘，特別係服務性行業，望埋啲留言多唔多投訴 / 負評，特別多甚至有埋苦主區嘅就真係要再三考慮清楚啦~

圖SOURCE 網上資料當然有真有假，睇完都要自己消化甚至再Fact Check吓！

另外如果真係搵到有網民討論過呢間公司成日請人甚至係流失率好高，記住睇真啲工作內容係咪真係適合自己！

工作內容 📄

睇過公司背景冇咩特別大問題，都唔代表可以即刻去馬！花多少少時間，細讀吓啲工作內容同要求。譬如有啲工作會要求輪更、公眾假期/特別天氣情況都要返工、出糧又唔一定係月薪制而且仲有啲福利係特別同其他工種唔同；又有啲情況係明明個職位名稱同上一份工接近，但實際要操作嘅嘢分別可以十萬八千里咁遠。所以，免得到時見工時先發現有地方唔適合變相浪費時間，不如之前就做多少少功課啦！

薪酬 💵

大家返工都係旨在出糧，遇著出手太高/太低嘅公司都記得要有戒心！係唔係出手太低想搵廉價勞工，可以靠坊間唔少網站 / 院校嘅薪金調查資料參考，亦可以網上搜尋同類型其他公司開價(公司架構同規模接近就更好)。如果唔係初出茅廬，比對自己對上一份工嘅價位都大概心理有數。

同行請人價位出手一般都唔會差好多，有啲公司甚至會列明範圍，咁就唔使左計又計，睇啱就可以申請！

同理，如果比較之下出手高出一倍甚至更多就一定要做好上面提過嘅背景調查喇！坊間真係有唔少騙子以$$$$$呃人落搭，到時又話公司要求讀埋啲乜乜物物課程，喺份糧度扣返就唔係得不償失咁簡單喇！

當然，有某啲情況比如係新公司招開荒牛、超級急聘、個人表現於行內極之出色，有其他行頭大佬想出高薪挖角又或者最近考獲一啲市場渴求嘅技能試/證書，都唔係冇可能得到比其他同級/同公司/同行高薪。