面試篇 – 4大貼士💡搵好工
去到面試階段，大家一定要記得「人搵工、工搵人」同互相尊重呢個道理，遇著好嘅待遇同面試者唔好覺得必然，相對地如果見工之後覺得有唔妥，亦唔需要勉強自己接受。面試之前除咗必須要睇真啲，接受咗面試安排之後亦有以下事項要留意：
-
形式
疫情關係，的而且確係多咗公司安排網上視像面試嘅，但千祈唔好諗住影唔到下半身就咁著住孖煙囪就算，萬一對方突然要求睇某啲要行去拎嘅資料，又或者面試時間一長就好易唔小心曝光。同埋香港地空間有限，面試期間記得講聲同住人知，鎖一鎖門都不失為好選擇。
面試嘅就唔該各位大人睇清楚時間同地點，以「蕩失路」、「唔知原來會咁塞車」為理由遲到，尤其超過15分鐘甚至更多嘅真係極扣分！而要求臨時改時間，就算有合理理由，唔係話唔得，但真係要明白唔係間間公司都可以再安排到時間見面，分分鐘會就此同份工完美錯過！又如果，面試地點唔喺公司入面，譬如話去咖啡店或者共享空間，就唔好怕醜問多幾句，萬一真係愈問愈覺得可疑嘅就要同親人同朋友商量吓喇！
咁直接電話 / 網上文字面試(如Whatsapp / Telegram)又可唔可信呢？都明白有啲行業係會咁做，但一定要記得要問清楚對方資料包括姓名、職位同聯絡方式，切忌喺未獲得聘用、未有合約詳情、未去過就職地點、未同呢間公司嘅任何職員正式見過面嘅情況下交出比如身份證號碼、戶口號碼呢啲比較私隱嘅資訊！
-
穿著
都唔好話帶有特定訊息嘅款式，太可愛嘅都可免則免啦~
各位畢業冇耐嘅朋友仔，可能學校教又或者大家都覺得著哂成套戰衣(西裝)去見工就一定冇死。事實上都部分正確嘅，但事實上大部分文職公司都係簡單、乾淨、整齊就得，冇話唔打呔者必死。呈交個人資料時如附有個人靚相，唔該盡量執返同一個人出嚟，太大衝撃嘅話會令面試者留低個唔太好嘅印象。亦請大家唔好化行哂妝(淡妝OK)、唔好戴一啲超有特色嘅口罩/領呔/帽/飾物，如果唔係面試者嘅集中點就會去哂欣賞果啲部分，又萬一當中有唔適合公司文化嘅，表現再好都要講Bye Bye~
-
談吐及問答
雖然面試係要將自己當成商品去推銷，但請大家唔好違反商品說明條例地瘋狂講自己過往嘅「功德」，尤其係讀書年代啲獎項，頂到盡都只係有10/100分嘅價值，建議只係夾埋喺堆證書同文件度，對方真係有興趣就會問。
唔吹捧，亦唔代表真性情乜都可以講，缺點嘅嘢人哋唔問就唔講係常識吧！到真係問起 (都真係大機會問嘅~)，講一啲無關痛癢嘅就好，舉個例話因為做事原則係求精準，所以會慢工出細貨少少，咁大部分人都容易接受。
有返工經驗嘅，100%會被問點解離職。記住就算對上一手「腦細」有幾多恨都要收埋，講壞話係會扣好多好多分！職場上係冇永遠嘅朋友同敵人，就算呢刻新舊公司係冇任何交集都好，冇人知將來會唔會有機會合作。對於回答呢個問題，都係從自己身上搵答案啦：自己想轉換工作環境、自己想搵新挑戰、自己更鐘意新公司文化……
好多人都會喺準備面試時好苦惱最後一個問題——「有冇咩想問」，秘訣就係唔需要刻意去諗定！只要成個面試過程係順暢同偏向成功嘅，對方如無意外都會講些少日後工作內容，呢個時候認真聽就會諗到應該問咩好~ 假如真係冇嘢想問/可以問，老老土土咁問「晉升機會」、「公司長遠發展」唔係唔得，只係與其係咁，不如誠懇地講句「暫時冇其他問題」咪大家好完場囉~
-
特別事項
除咗以上講嘅內容，面試都仲有好多技巧嘅~但見唔成功事小，掉返轉俾人呃先事大，所以大家首先要記得約咗面試一定要同屋企人/相熟朋友交帶！另外，如果大家見工時遇著呢啲情況，都一定要打醒十二分精神！
– 面試地點非辦公地點
– 辦公環境過份簡陋甚至冇任何辦公痕跡
– 招聘廣告所描述嘅工作內容同實際面試內容不符
– 面試者要求不必要身體接觸或有所暗示
– 要求先交錢/ 先由公司資助報讀課程
– 面試過程鬆散，對方急於取得個人資料
– 面試問題無關工作或過於私隱 (幾多屋企人同住 / 家人就業情況之類嘅問題絕不應被問到)
