預備Resume篇📋三大重點

之前同大家講過【求職篇】同【面試篇】，大家有冇發現呢個階段中間仲有好重要嘅嘢未做？冇錯，就係RESUME、履歷表！呢樣嘢喺雙方會面前，公司對求職者嘅第一印象，寫得好加分唔少，獲得面試嘅機會都大大提高！唔好以為某啲行業，尤其係飲食業呢啲見過面就完。好多時都係入職簽約時就會要大家補返，就算係朋友/親人介紹入職都一樣要！

講重點…咁咩嘢係重點？📌

籠統地同大家講 Resume 一定要講重點真係好似一句廢話，咁不如討論吓咩叫重點啦~首先強烈建議大家一定要用Point Form (列點)！等於大家都鐘意睇啲咩十大乜乜乜咁~咁樣先至方便對方以最快同最清晰嘅角度去了解面試者嘅背景嘛~

– 🎓學歷因應返工作要求，一般寫到中學就乜都夠。除非工作有講明要求有指定科成績要咩Grade以上，否則都唔使刻意寫

學廚跟過咩名師呢啲就一定要寫入CV啦！

– 有工作經驗就盡量將相關資訊量化 (變成數字)💯，譬如合共做咗幾多年、管幾多人、一個月平均寫幾多份稿、手上跟過幾多個大型 Project (同大公司合作過嘅可以列舉埋)等等。但唔好懶醒用圖表去整，咁樣反而增加咗對方閱讀理解嘅時間。更何況大家心目中指標唔同，與其浪費時間整色整水一啲原來對方都唔睇重嘅嘢，都係實際啲寫數據啦~

– 未有工作經驗嘅話可以落少少筆墨喺拎過咩獎項、參加過咩活動🥇上。當然一定要係可以同份工扯得上關係先好寫啦~譬如話做過學生會成員、去過外地交流呢啲就有利於對方了解多啲求職者嘅個人特質同性格

– ⚽技能、興趣都係寫同份工有關嘅就得，譬如見寫字樓文員話有潛水牌 (真係見過有人寫) 或者興趣係網球 (運動相關行業另計啦~) 就真係不了不了

版面設計🎨

Search一Search大把款任揀  (Source: Google)

只要唔係搵Designer / 創意產業相關工作，一般嚟講上網搵份顏色簡約嘅Template(範本)就好可以。Resume 都係一頁起就夠，排版上一定係放個人資料先，然後相關技能、工作經驗 (愈近期排愈前)，最後先係學歷

千萬一定要檢查嘅事項 👀

因為呢部份真係好重要而且好多教寫CV嘅網站都未必有提，所以請一定要認真睇！

(Source: static.vecteezy.com)

(1) 英文 Resume 定 中文 Resume？除非真係唔識寫英文，否則一定係用英文

(2) Check & Check & Check！寫好哂份 Resume，最好搵朋友仔幫吓眼同埋千祈唔好懶唔 Check 有冇串錯字同離哂譜嘅 Grammar✔️！好多時 HR 都會睇重呢部分，錯得太離譜唔係俾人笑咁簡單，係冇咗個見工機會！

(3) 太短期嘅工作經驗或者過份私隱嘅資料唔好寫落去！未正式見面之前，記得好多個人資料係唔需要主動交出去！譬如話幾歲、邊年邊月邊日生日🎂、身份證號碼同地址呢啲絕對可以等對方問到或去到面試填表時先提供。至於短期工作經驗就人人定義不同，除非係剛剛畢業啦，否則未做夠一個月嘅話一定算短啦！大家要諗清楚呢件係唔係寫落去有意義嘅事，加上如果本身都係轉工轉得頻密嘅，甚至會再加多咗負面印象！