上回講到辭職前後有咩DO AND DON’T，今次就延伸同大家繼續討論當真係決定離開呢個工作崗位之後點寫呢封「沈重的信」，收信人係邊個？係咪就咁講句「我要走」就得？要點解釋想早走？以上問題嘅答案及其他書寫時要留意嘅細節，我哋都會喺下文同大家一一探討。正所謂「山水有相逢」，今日嘅別離，好可能成就他日再相遇甚至合作，辭職處理得好，對自己一定有好處！
通用必寫必留意事項
咩職業先要寫辭職信？除非係講緊飲食業炒散 / 日薪地盤工 / Freelancer 呢啲日日返唔同地方又唔固定時間，否則唔好以為Full Time返Office嘅員工先要寫，不論係合約形式聘請 / Part Time / 暑期工 / 實習生，只要唔係正式完約，但要走，都要寫！
(1) 收件者
一般規模嘅公司同正常情況下，遞信前都會先同直屬上司交代咗，所以辭職信嘅收件者就係佢，而唔係真老細(除非直屬上司要求咁做啦)。如果知公司HR email address係咩亦要自己send埋副件畀對方，以防直屬上司貴人事忙，等辭職嘅相關手續可以順利進行。
(2) 表明立場
信件標題同第一句內容就要話自己寫呢款信嘅目的係希望離開(現任公司名稱)嘅(職位)，並於(幾年幾月幾日)生效。
(3) 多謝現任公司 及 闡述辭職原因
客套說話點都要講兩句，話多謝直屬上司/同事之間嘅幫忙 / 多謝公司畀機會同信任 / 喺度做得好開心好有歸屬感。然後入轉折位——不過 / 但係 / 好可惜本人要走喇！因為 (原因：同直屬上司交帶咗係咩原因就寫咩，都離不開係：轉工/ 轉換跑道(職種)/ 移民/ 告老歸田 / 個人原因 / 健康因素)……唔使寫多，一句起，兩句止！
(4) 願意提供協助
之後就要提到自己願意提供任何協助去幫接任者。如果不幸地冇下一手，就話會盡努力去完成餘下工作，如果有任何關於工作上嘅問題都歡迎大家嚟查詢，寫埋名同日期就可以send出去！
(5) 唔好寫其他額外要求
辭職信只要寫上面4點就夠，寫得信就係下定決心要離開，千祈唔好再加油添醋又或者突然「扭屎忽」要求升職加薪就考慮唔走！就算一心認為係同事或上司逼走自己 / 成個工作環境都好有問題 / 工作內容同預期不符所以做得好唔開心，都係同一句，下定決心離開就成熟啲，心有不甘要投訴 / 想要討個說法呢啲係遞信之前做！最最後，要求直屬上司 / 公司發出工作證明甚至係推薦信，應該喺口頭商量辭職時一併講埋，對方答應咗但又未收到可以循其他途徑去追，唔好同辭職信混為一談！
**
要求提早離職 Short Notice
收到新Offer，新公司希望自己可以盡快履新，甚至講明願意賠償代通知金畀現職公司，大家首要做嘅係去搞清楚自己份合約有冇註明辭職通知期，以全部情況都符合418連續性合約嚟講有呢幾個情況：
(1) 合約冇註明：試用期內第一個月後辭職，通知期不能少過7日；試用期第一個月內辭職，無須通知期及代通知金；冇試用期或試用期後辭職，通知期必須有最少一個月
(2) 合約有註明：根據入職時雙方同時及已簽署嘅僱傭合約而定
當需要提前離職，就要用代通知金去取代通知期，基本上去到真係要計嘅都會出動到HR，唔會真係要員工自己計，但為咗避免到時拗數，大家都應該要知個計算方法係咁：
一年總薪金 ÷ 365 x 通知期日數(通知期以日計嘅話)；
一年總薪金 ÷ 12 x 通知期月數(通知期以月計嘅話)
法例就有講明係唔可以用假期取代通知期，所以現任僱主係可以要求要離職嘅員工做到Last Day，通知期內完全唔批放假，然後佢事後再計返足年假賠償就得。但如果雙方都同意嘅(亦都係主流做法)就可以用清埋啲年假、補假呢個方式嚟提前走。
搞清楚哂自己有冇通知期同代通知金問題，同現任傾好，又同新公司簽好合約(保障自己，未簽約就Short Notice係有風險㗎！另外如新公司願意代賠通知金，記得要求白紙黑字留埋底！)就可以開始寫呢封Short Notice喇！Short Notice除咗上面提到嘅「必寫必留意」幾點之外仲需要：
- 提到無法滿足原先通知期
(例子：I would be glad if you could consider my request and reduce the notice period to xx days / months ; I hope you accept my apologies for such short notice; I would like to make a request to have an early relieve from the company)
- 現希望縮減多少及實質日期為何年何月何日
例子：My official resignation effective date is XX-XX-XX; My last day at the company will be XX-XX-XX;)
- 需要提前離職嘅原因 (最好有咁短寫咁短，唔需要提及新公司名稱及職位！)
(例子：I have gotten an opportunity at one of my preferred companies; I will have to leave my position due to personal reasons)
